Peren DC tejenba den tepila aser tasenba pela agizükba sentong repa agiogo

Dimapur, April 28 (TYO) : April 28, 2016 nü DC Conference Hall nung Peren District nüburtemi Deputy Commissioner tejenba Peter Lichamo den tepila aser DC tasenba Zarenthung Ezung pela agizükba sentong repa agiogo, ta sangdong ka ajanga metetdaktsü.
Tepila o jembiba mapang Peter-i, “Ni küm ana ser ita ka Peren nung aliba mapang district ketdangsertem aser külen inyakertem ajak dak kanga dang tazüok, amalitep aser kati ka nüngittepba inyaka shisatsü tajungtem ajangshiogo. District nung koda masüba tensa aika ajuruba mapangtem nunga lokti balalai shisa tajung lemsatepba ajanga kanga temulung süogo,” ta ashi.
“Tsüngrem teyari dena nüburtemi amalitepa inyakba ajanga tanü tashi kü wadang takok ngua bener arutetogo. Ni ya nübur tenzüktsü asoshi Tsüngremer hadir ka mesüka lir. District nung aliba nüburtemi kanga meima aser amalitepa inyakba atema kanga pelar aser tarutsü nung ni nenok mapa tajung teti bilemtettsü,” ta pai ashi.
Iba sülen Peren Deputy Commissioner tasenba, Zarenthung Ezung-i, ni nü nükjidong tongtsütsü meranga inyaktsü, ta pila aoba DC dang ashi.
Pai district ketdangsertem, külem inyakertem aser nüburtem dang DC tejenba den ama kasa amalitepa inyaktsü ayongzük.
ADC Tening, Thsuvisie Phoji-i, “DC Peter ya kanga dang terenemtet nisung ka lir, ta ashi.
DPDB züngsem tenüng nung jembidang PD (DRDA) Imtimenla-i, pa dak tensa tajung aser tamajung ajak koktetba shisatsü tajung liasü, ta ashi.
SDO (Civil) Peren D.Robin-i, mapang ajak nung DC ka pa alitsü tesem nung teti aliba dak ajak keta lir, ta HQ. Officers tenüng nung jembidang ashi.
PDDBA Tir Kurangbe-i, DC Peter-i shinga mebensai amshi, ta Gandhi den atishitepa jembi. Kasa sentong nung UDA Ramyina, Zeliangrong Baudi, Kuki Inpi (N) aser ZLR Mipui teloktem nungia o jembia liasü.
DC Peter ketdangsüba nung DC office, district HQ tasenbai mapang shitak nung belenba indang o jembir ajaki shisema liasü.
Iba sentong ADC Peren S. Tainiu-i ania telok pela agizük aser Jalukie nungi Rev. Fr. Jose Edaseril-i sentong tenzüka sarasadem.