Peren District kübok 7 Peren A/C nung lokti senden agi

Peren, Metsüremi/March 08 (TYO): Brehostibarnü Peren District kübok 7 Peren A/C nung lokti senden ka ayongzüka mena liasü; Kuhoto I. Awomi, Secy, DCC, Dimapur leniba nung iba senden agi.
Iba senden nung jembidang Young Brigade, Seva Dal Tir, Victor Naga-i, Nagaland nung Seva Dal ya nübur aikati meteta mali, ta ashi. Seva Dal ya 1924 küm January 1 nü tenzük aser iba ya India nung frontal organisation tejentiba rongnung ka lir. India nüchiso asoshi raraba mapang Seva Dal ya tenzük. Gandhi tangatetba nung Seva Dal tenzük aser iba ya Congress party atema tongtiret ka amai lir, ta pai ashi.
“Seva Dal melira Congress malitsü. Seva Dal ajanga Congress lennirtem nem security agütsür. Seva Dal nem temulung magütsüi aru, saka Rahul Gandhi-i mapa melenzükba sülen Seva Dal nem tashi agütsü aser iba telok yagi grassroot level nung inyaker,” ta Victor Naga-isa ashi.
Paisa ashiba agi, Seva Dal nung kongsang asem lir – Parental, Mahila aser Young Brigade.
Paisa loktiliba renloktsü asoshi külemi inyaktsü ajungshi.
NPCC secretary, Akavi N Zhimomi-ia lanurtem dang yimtenren nung shilem agitsü ajungshia liasü.
Pai Salt March, Mahatma Gandhi-i anir tenzükba indang tatishitsü amshia jembi, kong nisung 78 adenshir tenzük saka iba ajanga salt law raksatsüba kisüng dang masü saka otsü tasen yanglua liasü, ta ashi.
Modi-i ochimashi maliba sorkar ka nangzükba ya tiyazü lir pai ashi. Pai ashiba agi, Rafale deal atema Modi-i Anil Ambani nem saru agutsürtem indang sen crore 30000 agütsü. Congress-i nübur ajangzüktsü asoshi scheme aika benoka inyak, saka BJP-i nüburtem libaliru nung totuyuba agütsütsü meranger, ta paisa ashi.
Pakistan sepaitemi wing commander apuba mapang Modi-i olajang kata madok. Pai o tululu jembir saka pa tasa ajanga nüburtem timtem jenti ajurur, ta NPCC secretary-i ashi.
“Alima tejakleni aor, saka India tesüleni atsüngzüka aoer; Minimum Balance account tenzükba ajanga nübur mezüngmeshiogo. Congress-i sorkar kümtetra nüburtem ajangzüktsüsa sentongtem yanglua inyaktsü aser ajak külemi longjemer inyakba ajanga temelenshi bener arutsü,” ta pai ashi.
Iba senden nung Smti. Akheli, VP, NPMC, Shri. X Chophika Sümi, Co-cordinator, Social Media, NPCC, Shri. Mughabe Zhimomi, Convenor, Young Brigade, Dimapur nungertem dena liasü.