Peren nung ASHAs, AWWs atema orientation agi

Peren, October 30 (TYO): District Administration aser District Level Centre for Women-MSK-i Beti Bachao Beti Padhao, Peren kübok October 29, 2019 nü ASHAs aser AWWs atema block wise orientation programme tembanga aagiogo, ta ketdangsertem osang ka ajanga metetdaktsü.
Tesüsabuba session ji Ahthibung town nung agi aser shisalen sayurji Dr. Vezokholu Khamo liasü.
Iba sentong nung jembidang lai ASHAs aser AWWs indang teinyaktsü shilem indang metetdaktsü.
Dr. Vezokholu Khamo-i kinü tanur den tetsü kümzüka alitsü atema institution nung tanur asotsü aser tekaraba nung birth registration agitsü kanga tongtibang, ta ashi.
Laisa, tetsürtem jenjang tajungba akümtsü atema tetsürtem tsüngda kati ka ajungshitepa angazükteptsü metetdaktsü.
Iba sentong ya Women Welfare Officer (WWO), Heiriateilei leniba nung agi; lai BBBP inyakyim aser tetsürtem indang schemes metetdaktsü.
Sentong nungsa tetsürtem dang WWO-i benokba schemes dak sendakba nung mangatetjemba asüngdanga liasü.
October ita ya girl child ita lir, aser iba dak sendakba nung District Administration, DLCW-i Ahthibung Block kübok school balala semdanga tetsür chanutem nem shisaliok agütsütsü koda tongtibang, item tesayuba agüja liasü.