Peren nung COTPA Act 2003 atema training kaogo

Dimapur, March 19 (TYO): National tobacco Control Programme (NTCP)-i ayongzüka March 17, 2017 nü Additional Deputy Commissioner’s Conference hall, Peren Town nung Law enforcement Agency atema anogo ka orientation aser training programme kaogo, iba sentong nung tetushi tejaokerji Sarita Yadav, SDO (Civil) Peren liasü.
March 6, 2017 nü District level Coordination Committee (DLCC) senden nung lemtetba nung ajemdaker iba training ayonga aka aser iba sentong nung Peren district nungi ketdangsertem, sub division nungi police officers (OCs), Food Safety Officer Peren aser Peren jila nung Dobashi tem aden.
Iba sentong ya CMO Peren aser DLCC, NTCP Peren Vice Chairman, Dr. Ngangshimeren lenisüba nung agi.
CMO-i alima linüktem, linük aser local jenjang tashi nung moko achiba janga timtem balala adokdaktsüba indang metetdaktsü.
Iba training ajanga stakeholders ajaki iba programme indang rajema akumtsü aser iba Act junga benoka district nung temelenshi adokdaktsütsü imlar, ta paisa ashi.
Sarita Yadav-ia Nagaland nung moko achiba tebilemtsü indang jembi.
Laisa, state nung alirtemi moko aser moko agi yangluba chiyungtsütem kanga buloa achir, anungji asenoki tim department aser ozüng benokba agency tem tashi itdaktsütsüla aser iba tebilemtsü longjemer nokdangtsüla, ta ashi.
Dr. Sabino Kuotsu, Nodal officer NTCP-i COTPA (Cigarettes and other tobacco products Prohibition Act 2003) indang okila power presentation ka ajanga lemsatep.
Kasa sentong nung block headquarters ajak nung iba sentong akatsü aser law enforcement squad tentettsü lemteta liasü.
Iba sentong tembang Hoineichin Singson, Social worker NTCP-i tepela anküp o jembia liasü.