Peren nung Gram Swaraj Abhiyan sentong ayonga agi

Dimapur, Rongchii/April 30 (TYO): Gram Swaraj Abhiyan, (Village self-Governance Campaign) dak sendakba nung Rongchii/April 28, 2018 nü Peren kübok Punglwa yimdak Gram Shakti Abhiyan sentong tim Departments- RD aser Power den agiogo, ta tanü ketdangsertem osang ka ajanga metetdaktsü.
Yimdaklirtem den okila jembidang Peren ADC, Chubawati Chang-i iba sentong tongtibangba nükjidongji yimtsüng tashi itta akumtsü aser tejakleni aotsü atema lir, iba denji külemi yimdaklirtem tangutsü alibatem agutsütsü asoshi lir, ta metetdaktsü.
Paisa, yimdak yimsüsürtemi sorkar den amalitepa inyak nungang iba sentong takok angutsü, ta ashi.
PD Peren, Keyirangding Hegui-i, yimdaklirtem kanga tia taka, kechiyong state nung RURBAN facilities angubaji parnok dang lir, ta metetdaktsü.
VDB programmes dak alia RURBAN programme ajanga yimtsüng rongsenkettsüng atema nüngdakba aika agutsüogo, ta paisa ashi.
Tesülen pai yimdaklirtem dang sorkari benokba Direct Benefit Transfer (DBT) system tajangzük agitsüla; iba tajangzük agitsü atemaji Adhaar o Bank Account na sendakteptsüla, ta metetdaktsü.
Paisa yimtsüng merüka aliba atema pelaba metetdaktsüba den külemi yim terenlok atema Village Council aser züngsemtemi amalitepa inyaktsüla; yamaji parnokia akokba tashi yimdaklirtem yaritsü, ta metetdaktsü.
SDO Power, Jalukie, S. Yanpamo Odyuo-ia yimdaklirtem dang PMSBHGY, Integrated Power Development Schemes (IPDS) aser Deendayal Upadhyaya Gram Jyoti Yojana (DDUGJY) indang metetdakja liasü.
Onük jembidang Village Council Chairman-i sorkari mapatong balala inyaktsüba atema pelaba lemsatep.
Iba sentong ya BDO Peren, Iteising leniba nung agi aser BDO Jalukie, Kiengau Nda-i lokti pelaa agizükba o jembia liasü.