Peren nung ozüng alema temesepba mozü shibelener apu

Dimapur, September 24 (TYO): Assam Rifles (AR) mitkartemi Nagaland police nungi teyari agia Peren district kübok Athibung jila nung tentetba ozüng alema mozümora shibelener telok ka tan September ita 18 nü pua kasaji samatsüogo.
Headquarter 6 Sector AR kübok densemba 18 AR mitkartemi NSCN (KK) züngsem ta temulung melemi bilemba nisung ka, Alen ta ajar Lamkholen apu aser pa ket nungi nüburtem dang ayoktsü nokdanga aliba aser sen 3,14,000 jenjang shi SP capsule süngjang 25,600 aser Nitro capsule süngjang 2,800 tashi puogo.
Tan apusangi shishilembadak yokshitsü nokdangba mozüji Dimapur nungi shibelena Peren nung ozüng alema ayokba osang bushitetogo.
Ano külen, 37 AR mitkartemi Dimapur kübok Purna Bazar nung Ceasefire Ground Rules (CFGR) pangdak alema inyaka, tongpang nung amshitsü prangpong abener NSCN (IM) züngsem 1 tan September ita 21 nü puogo, ta AR sangdong ka ajanga ashi.
Purana Bazar nung ozüng alema raraba oset yokshibaren aser nüburtem nungi tashiyim agi senotsü akhangba osang angazükba sülen AR mitkartemi iba mitba maparenji inyak.
AR mitkartemi Purana Bazar-B kübok United colony nung alir NSCN (IM) nung Rajapeyu, arishi küm 28 tain Awang Wangsu’er ki mita bushidang .38 Colt Revolver prangpong ka apu, ta kasa sangdong ajanga ashi.
AR mitkartemi tan apusang aser pa ket nungi bena aruba prangpongji Dimapur East Police Station ketdangsertem nem amoktsüogo.