Peren nung tzü supply project semzük

Peren, January 19 (TYO): New Headquarter Complex, Peren atema tzü supply project semzükba sentong tanü agiogo, aser iba sentong nung tetushi tejaokerji PHED Minister, Jacob Zhimomi liasü, ta tanü ketdangsertem osang ka ajanga metetdaktsü.
Iba sentong nung jembidang Jacob Zhimomi-i, Peren District nung terenlok mapa aika inyaka arudar, anungji nüburtem tajangzük angutsü atema Department-i agutsüba kiojen/osettem ajak anepalua amshitsüla, ta ayongzük.
Kasa sentong nung technical report tongmelang agi metetdaktsüdang Additional Chief Engineer, Er. Repangyangba Longkumer-i, New Peren district Headquarter atema tzü supply project nung sen crore 9.3 indok, ta metetdaktsü. Iba project ya Government of India, DoNER Ministry kübok NLCPR-i yaria inyak aser treatment plant ji anogoshia tzü litre 1.14 million asutsü.
Deputy Commissioner Peren, S. Tainiu-ia iba project mapang shidak nung tembanga inyakba atema PHED dang pelaba metetdaktsü.
Commissioner & Secretary PHED, Dr. Maongwati leniba nung iba sentong agi aser paisa lokti pelaa agizükba o jembi.
Pastor Hekoraing-i Tsüngrem temoatsü meshia sarasadem aser SE, Er. T. Sangtam-i tepela anküp o jembia liasü.