‘Persistent Voice- A Student’ quest for Self-preservation’ kaket saya

November 31, 2019 nü Hotel Whispering Wind, Mokokchung nung “The Persistent Voice- A Student’ quest for Self-preservation” kaket sayaba sentong nung (abelen nungi) kaket zülur ana- Aso Imsong aser Longrangty Longchar na den AKM Tir, Imkongwati aser Kohima Ao Officer tem Telongjem (KAOT) Tir, Meyionen Jamir nunger tangokba noksa nung angur.

Mokokchung, Luchii/December 01 (TYO): Honibarnü Hotel Whispering Wind, Mokokchung nung “The Persistent Voice- A Student’ quest for Self-preservation” ta ser kaket ka sayaogo, ta osang ka ajanga metetdaktsü.
Iba kaket ya tamalen adokba kaket “The breach Wall” indang tanabuba edition lir. Iba kaket ya AKM Survival Mokokchung maparen nung ajemdaker züluba kaket lir.
Aoer loktiliba dak sendakba- maitsü, senmang aser ali kümzüka aser wazüka ayutsü nükjidong nung ozüng alema aruba Bangladesh nunger Mokokchung nungi mindoktsü atema AKM-i ketdangsüa AKM Survival Mokokchung ya agia liasü.
Iba kaket ya AKM indang project ka lir aser iba kaket zülur anaji senior journalists aser kaketzülurtem- Longrangty Longchar aser Aso Imsong na lir.
Kaket zülurtemi ashiba agi, ‘The Breach Walls’ kaket ya Mokokchung district kübok Survival Mokokchung Campaign aser AKM-i inyakba mapatem indang kaket ka lir, ajisüaka tang adokba kaket tasenba “The Persistent Voice- A Student’ quest for Self-preservation” yagibo state ajak den northeast India densema ayimjemtsü, koba ajanga Aoer loktiliba sasep noksa nung ajemdaker ozüng alema bendangertem arua aliba tebilemtsü angatettsü.
Iba kaket zülutsü atema field research taroki ia agiba den külemi kidanger state, Assam densema Nagaland nung tesem balala nungi shisashirtem, yimtenren lenir taintem, kaket zülurtem, Laishirtem, Professors, melungtet telok balala nungi lenirtem, shishilembartem aser nübur aika den interview agia liasü; iba dak alia kaket balala review süogo, ta kaketzülurtemisa metetdaktsü.
Longrangty Longchar-i ashiba agi, iba kaket ya nisung bendangshidangba mesüra ozüng alema aruba Bangladesh nunger anema masü saka teinyaktsü aliba tebilemtsü onük indang kaket ka lir.
Paisa, “Tangbo asenok kümzüka lir, ajisüaka asenok koba tashika kümzüka ali?, ibaji tebilemdangtsü onük ka lir,” ta metetdaktsü.
Iba kaket ya Kohima Ao Officer tem Telongjem (KAOT) Tir, Meyionen Jamir-i sayatsü.
Iba sentong nung jembidang Meyionen-i, ozüng alema aruba Bangladesh nunger nokdangtsü atema tanü tashi AKM-i inyaka aruba atema parnok nem tenüngsang agütsüba den külemi kaket zülurtemi Nagaland nung alirtem dang lenmang sayutsü asoshi iba kaket zülutsü atema research junga agiba asoshi pelaba shisem.
Meyionen-isa, shishilembaba sector nunga kongshia asen lisopurtemi melenzüka meinyak tashi aser tanga sectors nunga rangloker meinyak tashibo asenoki iba onük anema raraba tongbang ano metembang, ta ashi.
Iba dak sendakba nung pai AKM dang iba onük taliba süoki ia agitsü aser iba tebilemtsü bentettsü atema lenla balala nungi lenirtem jaoka o lemtepba sentong agitsü ajungshi.