Peru Tir election: Pedro Pablo Kuczynski-i takok angu

Peruvians for Change (PPK) yimtenren telok nungi Tir candidate, Pedro Pablo Kuczynski-i Tir election nung takok ngua Peru Tir tasenba akümtsü jenjang anguba osang angazükba sülen Lima yimtiba nung osangbener den ajurutepdang agiba noksa ka yangi angur. (Lima, June 10)

 Lima, June 10 (Agencies): Peru nunger rongsen ketsüng asür, Pedro Pablo Kuczynski-i taruba Peru linük Tir menden abentsü jenjang tajung anguba osang ka Peru nung tentetba National Office of Electoral Processes (ONPE)-i tanü, Hokolbar nü sangoktsüogo.

Peru linük Tir election agir külen anogo 4 shi vote züngdangba sülen Peruvians for Change (PPK) yimtenren telok nungi Tir candidate, Kuczynski-i vote timba ngua Tir tasenba akümtsü osangji yashi, Brehostibar nü tashi nung jangjatet.

Kuczynski-i vote noklang nung shilem 50.117 ngua, vote 49.883 angula, Popular Force (PF) yimtenren telok nungi candidate, Keiko Fujimori madak takok ngua liasü.

Aji oda, Kuczynski-i ajak agi vote 8,580,474 tashi ngua, vote 8,539,036 tashi angula, Fujimori den vote 41,438 agi timba anguba osang jangjaogo.

“Peru nübur ajunga dang pelaba metetdaktsür. Asenoki aroki lungjemer asen linük indang tarutsü jenjang tajungba kümdaktsütsü atema inyaktsü mapang tongogo,” ta Kuczynski-ia Tir election nung takok anguba osang angazükba sülen metetdaktsü.

“Peru nübur ajungai aroki lungjemer asen linük tenzüksü ayongzüker. Asenoki alizüng ayuba ama, tarutsü mapang, 2021 küm tashi nung asen Peru linük tangar linük menepba linük ka kümdaktsütsü nangzüker,” ta pai shisem.

Tan Tir tasenba akümtsü jenjang anguba sülen Kuczynski-i Ollanta Humala melenzüka, Peru Tir menden taruba July ita 28 nungi tenüka abentsü sentong lir.

Ajisüaka, Peru’er National Electoral Tribunal (JNE)-i tan election nung takok angur osang tejangja memetetdaktsü tashi par teloki election nung takok angur osangji magizüktsü lemtetba osang ka Fujimori’er teloki metetdaktsüogo.

“JNE-i sangoktsüba election nung takok angur osangji shitakba osang alitsü. Aji oda, ozü teloki tan election nung takok mangu ta osang sangdongra, ibajia agizüktsü melunga lir,” ta Fujimori pusemer, congressman Pedro Spadaro-i metetdaktsü.