Petrol aser diesel totzü GST küboki maittsü: Sushil Modi

New Delhi, Aami/June 29 (Agencies): Tanü GST Council züngsem aser Bihar Deputy Chief Minister, Sushil Modi-i, Goods and Services Tax (GST) küboki petrol products aitdaktsüra ibaji ajanga Central aser states saru nung takoksa angutsü, ta ashi.
Paisa, iba onük nung tang tashi GST Council-i telemtetba agia mali, ajisüaka kanga aritepa telemtetba agira ibaji ajanga Centre aser state sorkartem naprong saru nung kanga takoksa angutsü, ta ashi.
Bihar Finanace Minister, Modi-i, GST kübok petroleum products aitdaktsüyonga iba nungji GST saru shilem timtiba- shilem 28 agitsü aser state temia saru balala agitsü, ta metetdaktsü.
Yashi osangbenertem den jembidang NITI Aayog Vice Chairman, Rajiv Kumar-i, petrol aser diesel ji tangtangbo GST küboki maitdaktsütettsü, kechiyong petrol nung state aser Central saruji shilem 90 shi lir, ta ashi.
Pai ashiba agi, state shingaia GST kübok saru tasen ka atema memelungtsü.
Ajisüaka Modi-i, GST Council-i natural gas aser tayimtsü nung atsükba totzü- aviation turbine fuel bo GST küboki aitdaktsütsüa akok, ta metetdaktsü.
Tanü New Delhi nung “GST – Growing Stronger Together” omen nung senden nung jembidang pai, 2017-18 küm ita shia GST ajanga ajangzükbaji sen crore 89,885 liasü, ta metetdaktsü.
Tawa sorkari, Petrol aser diesel totzü GST küboki aitdaktsüra saru shilem timtiba, shilem 28 den state temi saruba local sales tax mesüra VAT alitsü, ta metetdakja liasü.
GST benoka inyakba nung inyaksemer tongti ketdangseri kati, “Alima tesem kecha nunga petrol aser diesel nung GST temeja mali, anungji India nunga GST aser VAT saru alitsü,” ta metetdaktsü.