Petrol aser diesel totzü litre shia nung sen 4 atutsüa akok

New Delhi/Monupii/May 17 (Agencies): Karnataka Assembly election atema nüboyimba mapang nung anogo 19 tashi petrol aser diesel nung jenjang metui ataba ajanga takoksa anguba menoktsüsa kümra totzü litre shia nung sen 4 atutsüa akok, ta brokerage firms-i metetdaktsü.
Karnataka Assembly election tembangliyongi linük meyong totzü company tem- Indian Oil Corp (IOC), Hindustan Petroleum Corp Ltd (HPCL) aser Bharat Petroleum Corp Ltd (BPCL) -i petrol aser diesel naprong nung jenjang tua liasü.
Iba mapang nungjagi tenzüka petrol litre shia nung poisa 69 tuogo, aser iba nungji tanü posisa 22 atuba densema lir. Tang Delhi nung petrol litre nung sen 75.32 kümogo, aser ibaji tesüiba küm pongu nung tang timba lir.
Diesel nunga litre shia nung poisa 86 tuogo, aser iba nungji tanü poisa 22 atuba densema lir. Tang Delhi nung diesel litre ka nung sen 66.79 kümogo.
“Taruba hoptatem nung diesel litre shia nung sen 3.5-4 aser petrol litre shia nung sen 4-4.55 atutsüa akok,” ta Kotak Institutional Equities-i osang ka ajanga metetdaktsü.
“Karnataka assembly magidang, tesüiba hopta asem tsüngda jenjang matuba den külemi global crude/product nung jenjang tali atuba ajanga gross marketing margins nung takoksaji litre shia sen 0.5-0.7 shi adoker,” ta parnokisa metetdaktsü.
Taoba hopta CICI Securities-i, Rongchii (April) 24, 2018 sülen jenjang matuba ajanga auto fuel net marketing margins nung litre shia sen 0.31 akoksar, ta metetdakja liasü.
OMCs-i Monupii (May) 14, 2018 nungi asentenshia anogoshia totzü jenjang yanglushidar. Parnoki sen crore 500 shi takoksa nguogo, ta asadangteter.