Petrol pumps dang ‘chips’ ayokertem apu

Muzaffarnagar, May 06 (Agencies): Petrol pump tem nung totzü alirtem nem petrol tera tajemba inoktsütsü atema amshiba ‘electronic chips’ ayokba maparen ka tanü Bihar police-i jungkai adoktsüogo.
Bihar kübok Muzaffarnagar yimti nung police-i electronic chips ayoker telok ka nungi züngsem pezü apu.
Lucknow nung aliba Police headquarters nungi osang ka agütsüba sülen police-i mita aodang nisung pezü apu, ta SSP, Bablu Kumar-i ashi.
Nisung pezüji Abbas, Arun Kumar, Ajay aser Gajendra nunger lir ta jangjaogo, aser parnok ket nungi chip ka, remote control 8 den sen 1,83,500 apu, ta paisa ashi.
Iba telok jagi remote controlled electronic chips yanglua ayoker, koba ajanga petrol aser diesel totzü tajemba agütsür, ta Kumar-i ashi.
Iba dak sendakba nung police-i ken o ka benokogo.
State STF-i April 27, 2017 aonunga remote control amshia electronic chip amshiba petrol pumps tenet pua liasü.
State Task Force ketdangsertemi ashiba agi, iba chips amshiba ajanga ita shia parnoki sen lakh 14 shi tajangzük angur.
Iba chip jenjangji ka nung sen 3,000 shi lir aser iba chips ajanga totzü alirtemi totzü shilem 5-10 agi tajemba angur.
Remote control ji ajanga limit yanglur, aser customer kati totzü litre 1 (ml 1000) alira, pai ajakji masü saka ml 940 shi dang angur.