Petrol totzü litre nung sen 25 ajemtsü koka lir: P Chidambaram

New Delhi, Monupii/May 23 (Agencies): Tanü Congress lenir aser taoba mapang Union finance minister, P Chidambaram-i, petrol litre shia nung sen 25 ajemtsü koka lir, ta metetdaktsü.
Pai ashiba agi, crude oil jenjang aluogo, anungji petrol litre shia nung sen 15 ajemtsü akok aser sorkaria petrol shia nung saru talila sen 10 ajemtsü akok, aser ibaji senteperbo petrol litre shia nung sen 25 ajemer asütsü.
“Crude oil jenjang ajemba ajanga Central sorkari petrol litre shia nung sen 15 kümzüker. Central sorkari petrol litre shia nung saru tali sen 10 agir,” ta Chidambaram-i twitter ajanga metetdaktsü.
“Litre shia nung sen 25 ajemtsü koka lir, ajisüaka sorkari yamaji meinyaktsü. Parnoki petrol shia nung sen 1 mesüra 2 ajemba agi nüburtem ashioktsür,” ta paisa ashi.
Tawa petrol aser diesel nung jenjang kanga atuba ajanga linük tesem aika nung nüburtem jashidar.
Yashi-a petrol aser diesel nung jenjang atuba sülen Union minister of state for finance, Shiv Pratap Shukla-i, International jenjang nung crude oil jenjang atuba aser US-i Iran anema tenokdangba agüja aliba ajanga totzü nung jenjang atur, ta metetdakja liasü.
Osangbenertem den jembidang Shukla-i, “Petrol aser diesel jenjang azüokba nung sorkari tamakok mangu, ajisüaka International market nung crude oil jenjang atuba aser US-Iran tezüngzüktep raksaba ajanga India dang masü saka tanga linüktema kongshiogo,” ta metetdakja liasü.
Ajisüaka totzü jenjang alutsü atema sorkari lenmang ka bushitsü merangdar, ta paisa shisem.
Union Petroleum Minister, Dharmendra Pradhan-ia, jenjang azüoktsü atema petrol ya GST kübok aitdaktsütsü akok, ajisüaka GST council-i telemtetba agi nungang ibaji akoktsü, ta shiogo.