PFP Dimapur unit-i alima nung yimjung atema mapa inyaker

Dimapur, Aenjeti (January) 9 (TYO): Aenjeti (January) 7 nü People’s Forum for Peace (PFP), Dimapur unit-i alima nung yimjung atema tamangba yimsü balala nungi lennirtem den ajurutep.
Gurudwara nung Guru Gobind Sahib indang asoba anogomung tenüng nung jembidang PFP tir, Taku Longkumer-i ashiba agi, Dimapur tajungba kümdaktsütsü atema tamangba yimsü balala tsüngda senden nüngdaker.
Iba mapa inyakba atema Marwari & Shri Digamber Jain Samaj tir, Om Prakash Sethi-i tenüngsang agütsü aser iba maparen ajanga Dimapur nung aliba telok balala tsüngda tesentaktep akangshitsü ta shisem.
Jama Masjid, Hazi Park nung Imam Sahib Panditji Bhupindar Sharma, Darshan Sahib Ajay Sethi aser Father Chacko nungertemi pei pei tebilembatem lemsatepa liasü.
Hindu Sewa Samiti tir Gopal Sharma-ia PFP nem tenüngsang agüja jembidang iba ama mapa tajung ya maneni inyakdaktsünür aser tamangba yimsü lennirtem dang pelaba metetdaktsü.
Peace channel Director, Dr. C. P. Anto-isa ashiba agi, Aenjeti (January) 14, 2018 nü PFP-i Baptist Church aser Buddhist Temple ka semdangtsü sentong lir. Iba sentong nung adentsü jangraba lennirtemi Holy Cross Higher Secondary School nung ajuruteptsü mepishir, ta paisa shisem.