Pfutsero nung constable kati azünga alidang mapa tajung inyaker

Dimapur, April 01 (Agencies): Pfutsero nung Nagaland constable kati jila merüka ayutsü atema pa indang Maruti Van ka nung jana bendena indoker; Neingupe Maru-i pa police mapa nung kanga mazüngi liaka azünga aliba mapang nung ano iba mapa tajung ya apiteta inyak tenzükogo.
Tesüiba anogo troknü tashi Nagaland Police nung arishi küm 28, Maru-i Phek district kübok block headquarter rongnung ka, Pfutsero nung iba mapa tajung inyaker.
Taküm January ita nung Pfutsero town committee anena liasü, aser iba dak alia nütsüng 10,371 aliba jila (2011 census) nung jana bendena intokba gari ka dang liasü saka ita ana tejaklen iba garijia raksaa liasü.
Nagaland nung highest town (2,133 metres above sea level) nung jana tali boluba ngua maremzükteti Maru-i pasasa item jana bendena intoktsü melungteta liasü.
Pai pa indang Maruti Van tejenji jana bendena intoktettsüsa yanglushiba sülen jila tesem ajaklen jana bendena jila nungi meta talangka pilar aliba tesem nung intok tenzük.
Pfutsero nungi Hindustan Times osangkaket den phone ajanga jembidang Maru-i, “Jana bendena ayubaji ajanga tashitak kar poktettsü südi ta ni arendaka bilem,” ta ashi.
Mezüng anogo nung pai jila nung aliba jana ajakji intoktsü atema gari nung janaji 21 ben tashi bendena intoka liasü. Iba mapang nungjagi tenzüka pai azünga aliba mapang nung pai par jila merükteter.
“Khenkhen anepdang aser khenkhen nikongdang ta ni lenmangtem merükteter, ibaji kü duty (police duty) dak keta lir. Tangbo jila ajak merüktettsü atema asemben-pezüben shi dang jana belener,” ta pai ashi.
Gari totzü aser nüngdakba osettem alitsü atema Maru-i pa sen intoker. Pai ashiba agi, pai shinga dang nungi senotsü teyari menüngdaker, saka Tsüngremi pa moatsütsü imlar.
Pfutsero nung alir aser melungtet telok, Kalos Society nung director, Kupelhi Losou-i, “Pai inyakba mapa atema pa nem tenüngsang agutsütsü tetemsü. Nisung aikati iba ama mapa inyaktsü memelungtsü, kechiyong iba ya tesempatsü mapa ka lir. Pa mapa inyakba anguba ajanga aika ajungshitsü,” ta ashi.