Pfutsero nung Free Football Grassroots camp agir

Pfutsero, October 19 (TYO): Pfutsero Sports Complex nung Nagaland Football Coaches Association (NFCA) ajanga anogo pongu tashi Free Football Grassroots camp agiba nung tanurtem 202-i shilem agidagi. Iba camp ya “Make Football Happen” omen nung ajemdaker agir.
Tanurtem 202 nungi parnok 20 tetsürtem aser 182 ya teburtem arishi küm 6 nung 14 tsüngda lir. Iba camp ya October 16 nung tenzük aser October 20 nung tembangtsü.
Tanü iba camp nung jembidang, tanurtem aikati shilem agiba asoshi NFCA tir Roko Angami-i pelaba metetdaktsü aser tanurtem dang lesson meranga azüngba den külemi football asayaba nunga temolung agütsütsü ajungshi.
“Kaket azüngba aser saisapong külemi aor,” ta pai ashi.
NFCA ya Nagaland nung football asaya temaba jenjangi ajungkettsü mechi tenzük. Iba ama camp ya Dimapur aser Kohima nung agiogo aser maneni Peren aser Mokokchung nunga kasa camp ya agitsü, ta NFC tir-i ashi.
Iba camp nung shilem agirdang pei taküm nung yimya tajung amshia meranga inyaktsü asoshia pai-sa shisem.
Iba sentong nung yariba asoshi The Kalos, coach tem aser Minister for environment, forest & climate change, Neiba Kronu nunger dang pelaba Roko-i shisem aser tsüraburtemi pei tanurtem iba camp nung adentsü yokba asoshia peleba lemsatep.
“Onoki nenok ya nüngtugu kümdaktsünür aser ibaji tanur asüdang nungi asaya tenzük nungang akümtsü,” ta NFCA finance secretary Vesupra Kezo-i ashi.
Sempet aketba tanurtem asayamung balala nung shilem agidaktsütsü asoshi NFCA-i yariteptsü aser yamaji club balala aser football academy balala den sendaktepba nunga yaritsü, ta Kezo-i ashi.
Iba camp nung shilem agir nem kuli kaket tem October 20 nung agütsütsü.
Iba camp ya coach William Koso, Nzanthung Ezung, Diethozotuo Neya, Neizokhrielie Sanchu, Zakielatuo Seletsu, Ciu Zashumo, Kadilinbo Zeliang, Thangchapu Rongmei, Rukuzo Ruho, Vesupra Kezo aser Daniel nungertemi anepalua agidaktsür.