Pfutsero nung Health Camp, Livelihood Enhancement sentong agi

Pfutsero, Monupii/May 28 (TYO): Pfutsero nung Health Camp aser Livelihood Enhancement Program ‘Pfutsero Chapter of Uplifting Women Street Vendors’ sentong agiogo, ta ketdangsertem osang ka ajanga metetdaktsü.
Nagaland nung lenmangtem nung aonsotsü ayoker shishilembartemi parnok atema lateta aliba maongka junga mengui kanga timtema arudar. ‘Street vendors Act 2014’ ya tang tashi Nagaland nung agizüka meinyakba ajanga lenmang nung shishilemartem nungittsü mesüra kümzüktsü atema inyakyim kecha mali.
Entrepreneurs Associates leniba nung lenmang nung shishilembartem ajungshitsü aser pei maparen tajungba küma takok angutsü atema inyaka arudar.
Entrepreneurs Associates (EA) indang project ‘Uplifting Women Street Vendors’ kübok lenmang nung shishilembartem tarutsü tia tajungba akumtsü, pei taküm azüoktsü atser taküm tetezü keta litettsü nükjidong yur parnoki state tesem balala nung item ama tetsürtem asoshi sentong balala ayognzüka katsüdar.
Iba dak sendakba nung EA-i philanthropic group, Caring Friends aser K & T Keditsu Foundation den ayongteper item nükjidong tongtettsü atema inyaker.
Monupii/May 26, 2018 nü Pfutsero jila nung aonsotsü ayonekertem aser wholesalers atema health camp den livelihood enhancement program ka katsüogo.
Baptist Theological College (BTC) auditorium, T Chikri nung ayongzükba sentong nungji tetsür noklang ka shi shilem agia aden. Iba sentong nung Cervical Cancer screening angati tendangtsüogo.
Doctor asem- Cancer Surgeon ka, Gynaecologist ka aser Orthopaedic ka den nurse 9 aser pharmacist ka densema parnoki health camp nung yariteoa Pap smear test angati agitsüba den külemi mozü agutsü.
Lenmang nung aonsotsü shishilembar tetsürtem den jembidang K &T Keditsu Foundation nungi doctor temi tetsürtemi pei temang anepalutsü aser pei temangji süolki ia agitsü nüngdak, ta ashi.
Dr Thejavinuo Keditsu-i ‘Basics of Women Health’ onük nung jembi aser Dr Keduovinuo Keditsu-i “Introduction of Cervical Cancer” onük nung jembia liasü.
Iba sentong ya Chakhesang Women Welfare Society (CWWS) Director, Kr. Vechulou Kanuo leniba nung agi.
Health camp agiba süslen EA team leniba nung “Livelihood Enhancement” sentong agia liasü, aser iba sentong nung Kr. Neikule Doulo-i aonsotsü ayokertemi aonsotsü ayokba dak alia tanga maparen balala densema inyakba ajanga senotsü tali ajangzüktsü atema ajungshia liasü.
Laisa tetsürtem dang, nüngdakba mapang nung pei temeden atema jembitsüka, ibaji ajanga dang ketdangseremi nenok timtem balala angatettsü, ta ajungshi.
Kasa sentong nung EA, Pfutsero branch manager, Cukhoyi Chiero-i tetsürtem dang pei tarutsü atema senotsü asalentong yanglutsüla aser senotsü ajnagzükba nungi karbo rizünga ayutsü nün dak, ta metetdaktsü.
Senotsü asalentong junga melira ibaji ajanga tarutsü tia kongshitsü, ta shia Cukhoyi-i aprnok dang, tekaratiba nung senotsü asalentong yangluatsü atema ajungshiba den küklemi EA Thrift aser Credit Cooperative Limited (EATACOL) kübok parnok atema product balala aliba indang metetdaktsü.
Tang agi tanabebbuba Pfutsero jila nung lenmang nung aonsotsü shishilemnar tetsürtem atema iba sentong ya ayongzüka katsür. Tamalena jila nung iba mesükba sentong ka agiba sülen parnok aikati senotsü rizüngtsü tenzüka rongsenkettsüng jenjang alangzükdar. Pfutsero aser kishikina tesemstem nungi züsentetba aonsotsü tajung aika state tesem balala nung ayonger, aser item aonsotsüji mozü (chemical) mamshii tsünüetbatem lir. parnok aikati aonsotsü balala Kohima aser Dimapur densema state tesem balalai yoker.
Ajisüaka tawa tetsürtemi ashiba agi, transport nung timtem ajanga parnok maparen nung kongshir, talisa Nagaland State Transport department indang bus kanga bulua araksaba ajanga parnok maparen nung timtem ajnngshidar.
NST us aika kanga tejen aser küm aika tasen memelener, ibayongji service junga magütsüteter.
Item ama tetsürtem aika kijasor tetsü, balalulaba amitsür aser chia-jemer kinüngtsürtem lir, ibayongji parnoki tayongzükba aika ajurur.
Iba tangatetba nungji ajemdaker Entrepreneurs Associates-i item ama tetsürtem akokba tashiu nungita parnok taküm jenjang tajungba kümdaktsütsü nükjidong yur inyaker.