Phantom film-i mezüng nü sen crore 8.46 aaogo

August 29, 2015: Salman Khan-i tongti shilem agiba film ‘Bajrangi Bhaijaan’ kanga takok anguba sülen ano Kabir Khan-i ‘Phantom’ film nung Saif Ali Khan aser Katrina Kaif na tongti shilem agidakja lir.
‘Phantom’ film ya Saif Ali Khan sapurtem asoshi kanga jangratemtsü film ka lir. Saif dak aliba actor sempet sayutsü asoshi pa iba amala film ka nung shilem agitsü kanga nüngdaka liasü. ‘Dil Chahta Hai’ aser ‘Omkara’ filmtem nung pai kanga junga shilem agiba sülen tang ‘Phantom’ film nunga kanga junga shilem agitetogo.
‘Phantom’ film ya Hokobar nü saya liasü.
Kabir Khan-i direct asüba ‘Phantom’ film ajanga mezüng anogo nung imlaba ama box-office nung sen crore 8.46 aatsüogo.
Iba movie yanglutsü jembidang nungi osang sünga liasü aser iba otsü ya Mumbai 26/11 lendong atalokba sülen koma asü iba dakji ajemdaker yangluba asünung Pakistan nungbo sayutsü memelar.
Saif-i shilem agiba film rongnung 2011 küm ‘Cocktail’ film ajanga mezüng anogo nung sen aika aaba sülenbo tan aaba ya timba lir.
Taruba hoptatem nungbo ‘Phantom’ film-a tanga film tem ama sen crore 100 aaba tarenseni aitsü imlar.