PHED dept-i Maongwati den tepila sentong agi

Kohima, Luroi/August 01, 2019 (TYO): Public Health Engineering Department-i July 31, 2019 Bodbarnü Principal Secretary PHED, Dr. Maongwati Aier, IAS den tepila sentong agiogo.
Dr. Maongwati Aier den tepila sentong ya Kohima kübok PHE Chief Engineer Office nung ayongzüka agia liasü.
Iba sentong nung Dr. Maongwati Aier-i jembiba mapang pai, küm 35 atema Nagaland nung nübur tenzüktsü lemzüktsüba ya maongka tulu lir, ta lemsatep aser iba temoatsü atema Tsüngrem nem tenüngsang agütsü. Iba denji külemi kinungertemi nungitba aser ketdangser den staff temi pei akok yari nungitta yanriba atema pai tenüngsang agüja liasü.
Dr. Maongwati Aier-i, pa den külem tenzüker ketdangsertem dak sempet tajung aketba ajitetta pelaba metetdaktsü aser pai parnok nem “Punctuality Team” nüngja agüja liasü.
Iba ama sempet tajung amshiba asoshi pai tenüngsang agütsü aser maneni item sempet amshia Department nung temelenshi adokdaktsütsü; iba denji külemi tayongzükba jenti liakasa nüburtem tajungtiba nung tenzüktsü asoshi tajungshiba agütsü.
Kasa sentong nung PHED, Addl.Secy, Mhathung Tungoe-i jembiba mapang pai, Dr.Maongwati Aier, IAS-i pa tenzükba wadang nung ajemoker mapa nungi animesüngzük tashi pai nüburtem atema shilem tuluka agiogo aser pa mapa tajung ajitetta pa nem 2011 census atema India Tir-i pa nem National Award 2 agizükogo. Iba denji külemi 2013 General Election to the state Assembly atema Election Commission of India-ia pa nem award agutsü aser wadang nung nendaka tenzükba asoshi 2001 küm pai Governor’s award agizükogo ta metetdaktsü.