PHED-i Global Handwashing Day ayongzüka amung

October 15, 2016 nü Kohima kübok Vineyard School, Lerie (temalen) aser Mokokchung district kübok Khensa yimtsüng nung Global Handwashing Day amungdang agiba noksa angur.

Kohima, October 15 (TYO) : Honibarnü PHED, Rural Division Kohima-i Vineyard School, Lerie nung Global Handwashing Day ayongzüka amung.
Iba sentong ya “”Make Hand Washing a Habit!” omen nung ajemdaker amung aser tongti tesemdangerji ADC Kohima, Lithrongla Sangtam liasü.
Sentong nung Lithrongla-i o jembidang, teka metsükba ajanga tajangzük angubatem metetdaktsü.
Sapon agi teka metsükba ajanga tashidak aika nungi kümzüker ta asüba angatetdaktsütsü atema iba sentong ayongzüka amunger, ta Er Mezivil Kikhi SDO (PHED) Kohima Rural Division-i onük jembidang ashi.
Handwashing Day ya tanurtem aser school tem nung dang amungtsüba masü saka nisung ajaki amungtsü akok. Ajisüaka, merükmejuba tsütsü tanurtemi dak temulung agüja iba anogo ya tanurtem den amunger, ta paisa shisem.
India nung Global Handwashing Day ya Ministry of Drinking Water & Sanitation aser MHRD nati ketdangsüa amunger aser ministry-i merükmejuba maparen nung teka metsükba densema lir. Küm shia India nung tanur 2000 shi diarrhea aser pneumonia ajanga taküm samar aser parnok eongnung tanur 1600 bo diarrhea ajanga asür. Iba jagi asenoki teka metsükba yimya sübatsüla, kechiyong teka metsükba ajanga item tashidak nungi asenok jenbua litettsü, ta Er Mezivil-isa ashi.
Sentong nung Er. Jakpou Khiamniungan, Executive Engineer, PHED Rural Division Kohima-ia okila jembidang ashiba agi, kümshia October 15 nü alima nung Global Handwashing Day amunger.
Mezüngbuba Global Hand Washing Day ji 2008 küm amung aser iba mapang linük 70 den tema nung tanur million 120 shji kati sapon agi teka metsük. 2008 nungi alima lennnirtemi Global Hand Washing Day ajanga teka metsükba, teka metsükdak yangluba aser tippy taps yanglutsü osang proskhitsü meranger, ta paisa metetdaktsü.
Sentong nung mendenji Thepfulie Theünuo, Sanitation & Hygiene Consultant DWSM, PHED liasü, Elow Khekho, Asst Headmaster, Vineyard School-i tesentepertem pela agizük aser Rebecca Kikon, IEC Consultant, DWHM, PHED-i Handwashing indang temetettsütem sayu.