PHED-i National Swachh Shakti Week sentong ayonga among

Kohima, March 10 (TYO): Tanü Public Health Engineering Department (PHED), Rural Division, Kohima-i National Swachh Shakti Week den International Women’s Day repsema Executive Engineer PHED Rural Division office nung sentong kaogo.
Iba sentong nung jembidang Mevuhole Felicita-i, tetsürtem tashi, parnok shilem aser parnoki inyaktetba metetdaktsütsü atema tetsürtem anogomung amungba ya tongtibang shilem ka kümogo, ta metetdaktsü.
Laisa, tetsürtem nem tashi agütsütsü nüngdak, kechiyong tarutsü putu yanglutsü atema laji tongtiret lir, ta ashi.
Tetsürtem tashi itdaktsütsü atema hadir tajungtibaji shisaliok lir, ta shia lai, kaketshisatsü alir tetsürtemi parnok tashi aser parnoki inyaktettsübatem jangjatsü aser loktiliba yangerba nung tejakleni aotsü, ta ashi.
Merükmejuba dak sentakba nung lai, tzü temerük aser sanitation ajanga tetsürtem anema aliba jenjang tajungba akumtsü aser akhüm alitsü, ta ashi.
Sanitation & Hygiene Consultant DWSM PHED Kohima, Thepfulie Theunuo-ia, temelenshi atema wako amertemji tetsürtem asutsüla, ta ashiba den külemi nüburtem merükmejua alitsü asoshi osang sangdongtsü atema tetsürtem tasü aittsüla, ta ayongzük.
Hopta piyong agiba Swachh Shakti week dak sentakba nung pai, “Vision/ Dream of a Clean Village” omen nung kaketshir tetsürtem atema painting competition, ‘menstrual cycle to girl child awareness campaign’, loktii merükmejuba aser tetsürtem atema exposure trip ka kaogo, ta metetdaktsü.