PHED Minister-i Wokha town water supply project semdang

Wokha, April 27, 2017: Brihostibarnü state PHED Minister, Chotisuh Sazo-i Engorotchu ayong nung Wokha town water supply project semdangba mapang tangokba noksa nung angur.

Wokha, April 27 (TYO): Non-Lapsable Central Pool of Resources (NLCPR) project dak sendakba nung tanü PHED Minister, Chotisuh Sazo-i Wokha town water supply project semdanga liasü.
Minister den PHED Chief Engineer, Er. Kevisekho Kruse, Wokha Deputy Commissioner, Department nungi ketdangsertem aser lokti lenirtema liasü.
Iba project kodang tembanga inyakdir, iba ya ajanga Engorotchu ayong nungi tzü atsüa Wokha jila atema anogoshia tzü 3.75 million litre tali agütsütsü imlar.
Tanü minister-i anir ketdangsertemi semdangba mapang civil construction oset balala, electrical aser pumping unit installations mapatem tatemer dang ta busitet aser kobi melii iba mapa semzüktsütsü imlar.
Iba projet semzükba ajanga nüburtem nem tzü tajemtsü tajung peria agütsütsü aser jila nung tzü agi anüngba tebilemtsü koktettsü. Iba dak alia online payment inyakyim ajanga department saru tajungba akumtsü imlar.
Iba project semdangba sülen Minister Sazo-isa tang Wokha jilai supply tesüdak Etchuchuka semdangga liasü. Iba ya ajanga anogoshia tzü 1.75 million litre supply asür.
PHED ya tamalen PWD nung reptepa liasü saka 1974 küm julira Department ka akum.