PHED Mokokchung-i ‘World Toilet Day’ among

Dimapur, November 19 (TYO): Mongulbarnü PHED Office Mokokchung nung World Toilet Day tenüng nung sentong ka ayonga agi.
India nung state aikati Open Defecation Free (ODF) Status angutsü atem merangtepdang Nagaland nung yimtsüng tia nung aliba tesemtembo 2018 nung Open Defecation Free (ODF) ta sangoktsüogo. Nagaland-i ODF Status tongtetba ya yimtsüngtemi yaritepba ajanga lir, ta PHED Mokokchung Executive Engineer N Yanger Pongen-i ashi.
India nung yimtsüng tia nung alirtemi metsümeshidak meyangluteter kechiyong parnok aika aayangertem dang lir aser metsümeshidak ka yanglutsü atema parnoki ita trok shi nung aazükba endoker. Iba ama tensa ka nung India sorkari SBM mapa tenzüktsüogo, ta N Yanger-isa ashi.
Nagaland-i ODF Status tongtetba nung department atema tebilemtsü tulu lir aser ibaji ODF ya magientsüba den yimtsüngtem tali temerükba kümdaktsütsüba lir, ta paisa ashi.
Sentong nung Sanitation & Hygiene Consultant WSSO, PHED Tsungrusungla Jamir-ia o jembidang “World Toilet Day amongba ajanga metsümeshidak ya taküm kümzüker, akhüm kümzüka ayur aser maongka agütsür ka ama züngshir” ta ashi.
Metsümeshi shitak masüba aser metsümeshidak maliba ajanga nisung lakh 4 tema tashidak balala agi süogo. Arishi küm 5 teküpok aliba tanur lakh 2 dak tema Cholera, typhoid, dysentery ama tashidaktem ajanga taküm samaogo, ta laisa ashi.
Iba sentong nung Village Council Chairman, Longmisa Yashiemba; WATSAN Chairman Chami Village Temsuwati Jamir aser WATSAN Chairman Ungma Village Limayanger Jamir nungertemi ODF tongtetba indang osangtem lemsatep.
PHED field staff temi teküpoktiba jenjang tashi alua osang prokshiba aser yaritepba ajanga ODF jenjang tongtet, ta parnoki ashi.