Phek ADC-i ak wara atema tekümdangtsü sangdonger

Dimapur, September 17 (TYO): Tang ak wara aliba dak sendakba nung Phek Town Council (PTC) nung Administrator aser ADC, Kuko Mero-i, jila nung nisung achitsü atema tepsetba ak ajak shi ayoktsü metenzükdang yongi veterinary department ajanga tendanger temelaba angu nungdang ayoktsüla, ta ozüng agütsüogo.
Sangdong nung ashiba agi, iba tendangba mapa asoshi technician/veterinary tem PTC office nung alitsü.
Ak metsür shirnoki pei metsüba ak, shi ayoktsü atema tepsettsü sentong lir parnoki mezüng PTC office den tongtepratepa tendangba sülen temelaba ngur ang tepseta ayoktsüla, ta kasa sangdong ajanga ashi.
Temelaba makai yokra Nagaland Municipal Act, Section 453 nung aliba ama tayoker aser shi ajak pua ayutsü. Anungji pei kiyong nung kari danga ozüng alema benshiba putetra chairman/GB temi yakta osang agüjang aser pua yuang, ta kasa sangdong ajanga metetdaktsüogo.