Phek aser Kohima jila nung Transformation Crusade akatsü

Dimapur, January 30 (TYO): 2013-14 küm Kohima aser Dimapur na nung Transformation Crusade nung kentenba aser sayatenya mapatem (Mark 16:20) ajangshir Phek Town Arogotem ajak (denomination ajak) nungi Pastors Fellowship-i February 4-7 anogotem nung Phek Town local ground nung “Arise & Shine” omen (Isaiah 60:1) nung Transformation crusade ayongzüka lir, ta Honibarnü Publicity Committee Transformation Crusade Kohima-i sangdong ka nung metetdaktsüogo.
Iba crusade nükjidong ya lanurtem satan külemba nungi anir arutsü, Tsüngremer mission atema aiür asangurtem anitettsü aser shi nung taneptsü anguba aser Arogotem ajak nung revival atema ayonger.
State nung satan külemba ajanga temesüzükba nungi anir arutsü atema Transformation crusade ya ayongzük. Iba crusade ya lanurtem atema dang masü saka ajak atema, anungji iba crusade nung dena temoatsü, taneptsüba aser azükaru agitsü atema tamang nung arua dendaktsüner, ta sentong ayongertemisa metetdaktsüogo.
Kohima nunga Transformation Crusade ya February 24 nungi March 6 nü tashi local ground nung akatsü. Tali metetpelatsü atema phone number 9612694659 ajanga tongteprateptsü akok.