Phek District Hospital tajungba küma yanglushi

Dimapur, January 30 (TYO): January 30, 2019 nü Phek nung District Hospital jenjang ajungketba sentong agi. Iba sentong nung Health & Family Welfare Minister Pangnyu Phom-i tetushi süa jaoker ama shilem agia liasü.
Phek civil hospital ya District hospital balaka ama lapok aser iba mapang yipten 75 liasü. Ajisüaka, ki tejen küma aoba aser infrastructure shitak maliba ajanga mozü ki ajanga mapa meinyaktet aser nüngdakbapurtemi timtem jenti ajuru, ta tanü Pangnyu Phom-i o jembidang ashi.
Nagaland nung health system tajungba küma arudar aser ibaji talisa National Health Mission kübok mapa balala inyakba ajanga lir. Ajisüaka, health infrastructure jenjang mejungi lir aser state ket nung senotsü peria maliba ajanga linük jenjang metongteter, ta paisa ashi.
State sorkari public rejutem aser services tajungba kümdaktsütsü atema communitization policy tenzüka lir aser iba nung nisung ajaki shilem agitsü ayongzüker, ta Minister Pangnyu-isa shisem.
Tanü sentong nung mendenji Principal Director, Directorate of Health and Family Welfare, Nagaland Dr. Vikeyie Losu liasü, Principal Secretary, Health and Family welfare. Dr. K. Hosi-i tesentepertem pela agizük, Phek Citizen tenüng nung Dr. K. Hosi-i jembi aser Medical superintendent, District hospital Phek Dr. M. Tiala Longkumer-i anküp tepela o jembi.