Phek district kübok organic aluyimer training aka

Dimapur, Yimpoksüi/November 20 (TYO): Mission Organic Value Chain Development for North Eastern Region (MOVCD-NER) phase-II program kübok Department of Agriculture, SDAO Chozuba, Phek district puri Yimpoksüi/Nov 6 aser 7 nü organic aluyimba dak sendakba nung training sentong ayongzüka kaogo.
Iba training sentong ya Chozuba yimtsüng aser Sekruzu RD Training Hall nung kaa liasü. Sentong nung okila SDAO Chozuba Thepusa Nakro-i jembia liasü, shibai aluyimertem den organic aluyimba tajangzük indang lemsatepba den organic aluyimba nung tinyaktsü aser minyaktsübatem metetdakja liasü.
EAC Sekruzu, iba sentong nung tetushi tesemdanger ama arua aden aser pai Nagaland nung organic aluyimba tajangzük aser nükla indang lemsatepba den cardamom aluyimertem dang department teyari agia iba spice ya shishilembatsü asoshi telungjunga tsünütsü ajungshi, kechiyong iba spice ya jenjang aketba spice ka lir.
Training sentong nung shisalen agütsür A.I, Chozuba, Mhalevilie Thorie aser Agriculture Demonstrator, Spice board of India nungi Manjai Phom-i “Organic farming”, “Production and post harvest technologies of Ginger-Organic approach” aser “Production and post harvest technologies of Large Cardamom” onük nung ajemdaker tangazükba balala agüja liasü.
Iba training sentong anapronala nung agriculture department aser organic aluyimertemi shilem agia takok nung tembangogo.