Phek Forest Division-i Phokhungri tesem nung solar lamps alem

Dimapur, April 1 (TYO) : Phokhungri tesem nung aliba Pine Forest wazüka ayutsü nükjidong nung Phek Forest Division-i iba tesem anasa alir nem solar lamps lema agütsü.
Iba tesem nung electricity maliba aser power supply peria manguba agi yimdaklirtemi tesangwa angutsü atema pine aronger. Ajisüaka iba ya Pine Forest wazüka ayuba nung timtem ajuruba dang masü saka mopung tamajung asüketbaji nisung temang atema-a majung.
Iba jagi Forest Department-i Mumbai nungi Eco-Solutions ta ajaba NGO den yaritepa Myanmar arrtsü anasa aliba yimtsüng pezü – Avakhung, Phokhungri, Latsam aser Old Thewati nung solar lamps lema agütsü.
Solar lamps ji Eco-Solutions coordinator Yatendra Agarwal-i mulungsoa tenla agütsü aser taküm March ita tomlen Phek Forest Division-i solar lamps lema agütsüogo aser ano maneni tanga yimtsüngtem nunga lema agütsütsü sentong lir.
Avakhung, Phokhungri, Latsam aser Old Thewati village council aser lennirtemi Yatendra Agarwal dang pelaba metetdaktsüogo aser ano parnokisa DFO Phek, Rongsenlemla Imchen IFS-i parnok tsüngdong arua solar lamps agütsüba atema la dang pelaba metetdaktsü.