Phek jila nung BBBP dak sendakba nung Health camp agi

Phek, Luchii/Dec. 22 (TYO): Beti Bachao Beti Phadhao campaign dak sendakba nung District Administration, Phek-i District Hospital, Phek den ayongteper December 21 nü DC Office Complex nung “A Healthy Women, A Healthy Family” omen nung health camp ka agiogo, ta ketdangsertem osang ka ajanga metetdaktsü.
Iba sentong ya Thepuchiyi Nienu, Office Superintendent DC Office Phek leniba nung agi.
Okila jembidang SDO (C), Sadar, Phek T. Lemlila Sangtam-i, Beti Bachao Beti Phadao campaign nükjidong ya awareness agutsütsü aser tetsür chanutem welfare services tajungba akumtsü atema lir, ta metetdaktsü. Laisa, anema aliba tetsür kati anema aliba kibong ka yangertettsü, anungji kibong aser loktiliba atema la temang anema alitsüji kanga tongtibang, ta ashi.
“What Health issues affect women different than men?” onük jembidang MD, District Hospital, Phek, Dr. Limanukshi-i, terenlok aliba linüktem nung nütsüng shilem 71.41 bo tetsü aser tanur nütsüng lir, anungji tetsü aser tanur anema alitsüji kanga tongtibang, ta ashi.
Paisa anema aliba tsütsü tetsürtem kongshiba tebilemtsü onük balala metetdakja liasü.
Kasa sentong nung District Hospital, Phek nungi staff nurse, Nibelo-u-i “Health living- what you can do” onük jembia liasü.