Phek nung African Swine Fever putet

Dimapur, July 22, 2022 (TYO): Phek district kübok Phusachodu yimtsüng nung African Swine Fever (ASF) adoka lir ta Additional Deputy Commissioner, Pfutsero, Japheth Woch, NCS-i ashi.

NERDDL, Khanapara, Guwahati nung laboratory test report ajanga ASF aliba putet ta Assistant Veterinary Surgeon, Pfutsero-i shidi ka zülu aser iba nungji ajemdaker tenokdangbatem agütsür ta Japheth Woch-i ashi.

Phusachodu yimtsüng aser temeket kilometer 1 telongtet ‘infected and containment zone’ ta sangdonger. Ano, iba yimtsüng nungi kilometer 10 telongtet nung aliba tesemtem- Thipuzu, Rihuba, Kikruma aser Rukizu Colony, Pfutsero ‘surveillance zone’ asütsü ta ADC Pfutsero-isa metetdaktsü.

Iba tesem nung tanga tetuyuba ka magütsü tashi ak taküm aser akshi belenba noktanger, ta paisa ashi.

Nagaland nung taküm ASF wara adokba sülen ak 6403 tashi iba tashidak ajanga süogo ta AH&VS indang ASF Core committee-i metetdaktsüogo.

Taküm April ita Longleng, Mokokchung aser Mon nung ASF puteta liasü aser June ita Dimapur nung putet.