Phek nung awareness sentong ka ayongzüka agi

Phek, Mongputei/October 2 (TYO): Mahatma Gandhi sor küm 150 ajungba anogo nüngtem nung ‘violence against women and children’ onük nung ajemdaker October 2 nü Phek DC Conference Hall nung awareness programme ka ayongzüka agiogo.
Iba sentong ya District Administration aser District Level Centre for Women, Mahila Shakti Kendra & Sakhi-One Stop Centre, Phek sentepa ayongzüka liasü. Iba sentong nung nisung 100-i shilem agiogo, koba NGOs/Shelter Homes, tetsür lokti tentet balala, Arogo-Pastors/Tetsür lenir/lanur lenir aser colony shia nungi tetsür lanur lenirtem dak rangloker ayongzükba sentong ka liasü.
Bewe-u Marhu, Counsellor, Sakhi-One Stop Centre, Phek lenisüba kübok iba sentong agi. Sentong nung o jembiba mapang SDO (Civil) T. Lemlila Sangtam-i tetsür aser tanur teim mesüi benshiba nokdangtsü koda tongtibang, iba indang lemsatep.
Laisa, tetsürtem mezüngmeshia amshiba, tajemzükba tia nung toktsüba aser tetsürtem nem maongka peria magütsüba indang lemsatepa liasü.
Domestic violence dak sendakba nung Documentary ka Jitsiasa Nyusou, Centre Administrator, Sakhi-One Stop Centre-i sayua liasü.
Adv. Vevohulu Chizo, case worker, Sakhi-One Stop Centre Phek-i, tetsür aser tanurtem anema inyakba maparen balala dak ajemdaker jembi.
Lai, POCSO Act, IPC, Domestic Violence Act, 2005 aser Cyber Crime onük tem nung ajemdaker jembia liasü.
Sensaksemba mapang NGO aser tetsür lokti tentet balala nungi shilem agirtemi parnok tebilemba lemsatep aser tetsür aser tanur anem inyakba maparen balala tebilemtsü kaa bilemba lemsatepa liasü.