Phesama anentsüh ajanga ki 23 raksaogo aser kibong aika den rejutem timtemer ; SASU-i kaketshirtem khen atema anenzüktsü teyari agütsür

Kohima, August 24 (TYO) : Tzünglu aruba manenba agi Phesama anasa National Highway-2 nung anentsüh maneni alur aser iba temeket nung ki 23 tashi raksaogo.

Kohima aser Mao Gate, Manipur sendaktepba NH-2 nung shilem tulubalen ka anentsüh agi raksatsüogo aser ibaji dang masü alutem aika raksaogo, ta osang angazüker.

Anentsüh aluba tesem nungi kibong 13 tashi pei ki toktsür tangaleni ogo aser lendong nungi kümzüktsü atema teyaritepertemi kitemji benogo.

Phesama yimertem aser Kohima District Disaster Management Authority (DDMA) na yaritepa tetsüng lenmang ka yangluogo.

Ano, Southern Angami nunger litsü nung aliba St. Joseph’s College Jakhama aser Japfü Christian College Kigwema na den tanga shisaluyimba rejutem aika tetsükdaktsü ajuruba osang lir.

Anentsüh aluba ajanga Southern Angami Youth Organization-i Chakhabama nungi Kidima village road nung gari tulurtem mesenzütsü tetuyuba agütsüogo.

Senzüsenbongertem atema lenmang ka dang lir aser ibaji Chakhabama nungi Kidima yim tashi senzüba lenmang lir. Iba lenmang ya Manipur state-ia nüngdak mapang nung amshitsü akok, ta SAYO General Secretary, Neiba Bio-i sangdong ka nung metetdaktsü. Anungji, iba lenmang nung gari tulutem senzüba noktanger, ta paisa shia lir.

Ano, Southern Angami Students Union (SASU)-isa St. Joseph’s College nung day scholar tem khen atema Jakha jila aser Viswema yim nung anenzüktsü atema teyari agütsütsü ta sangdong nungsa metetdaktsü.

Tejangrar kaketshirtemi Bodbar tashi nung item nisungtem den tongteprateptsü akok. 8575191481 (Kelethuzo Yosa, President, Jakhama Students’ Union), 8014800748 (Vibozoto Yiene, President, Jakha Town Hostel Union), 9436642764 (Nokhrul Vitsu, Vice President, Viswema Students’ Union), 9612848573 (Vikekul Sothu, Educational & Statistical Secretary, Viswema Students’ Union).

Japfü Christian College nung kaketshirtem atema Kigwema yim nung anenzüktsü atema lenmang lir, anungji tejangrartemi 9856468252 ajanga tongtepratep nung ajungtsü, ta SAYO sangdong nungsa shia lir.