Phil Collins teperem surgery agiogo

October 08, 2015: Nüngtugu kentener tejen Phil Collins teperem surgery agiba sülen temang kanga junga shilanga arudar.

Genesis kentener telok nung 1970 nungi dena arusang, Phil Collins ya New York City nung Mongolbar aonung (Oct. 06, 2015) ‘charity dinner’ sentong ka nung adentsü liasü saka pa October 04, 2015 nü operation agiba ajanga sentong nung medentettsüsa aküm.

Waldorf Astoria hotel nung saisapong tsütsü nüngtugu nisungtem sendenba sentong akadak madenba asoshi Florida mozü kidang nungi video message ka ajanga pa titem lemsatepa liasü, ta New York Daily News ajanga ashi.

“Hau ni taonung nenok den adentsüba liasü saka Dr. Green-i ni asoshi tanga sentong ang ka yanglur liasü. Ni October 4 nü teperem operation agi aser tangang temang tera shilanga arudar. Ni tang Miami mozü ki ka nung lir,” ta pai lemsatepa liasü.

World Entertainment News Network (WENN)-i press den asüngdangtepba mapang Phil indang osang, tanga ngua aliba dang nungi kecha tali mongutet.

Paralysis tashitak yaritsü asoshi pai ‘Buoniconti Fund’ bendenba nung angati yariba asoshi iba sentong nung pa nem award agutsütsüba liasü.

Sentong nung nüngtugu kentener tejen Gloria Estefan-a dena liasü.