Philippine army-i Islamist kiralongrartem amak

Marawi, June 17 (Agencies): Honibarnü Marawi nung Philippine sepaitemi Islamist kiralongrartem amak aser iba yimti nung sepai talila mapa lemzüktsüogo.
Malawi nung ita ka jungnüa khatepa arudang nisung 300 shi süogo.
Tanü Philippine air force ajanga anünglen nungi kiralongrartem jenoka alidak amak aser iba mapang ali nung sepaitemi kiralongrartemi mendanga aliba tesemtem amak, ta AFP journalists-i ashi.
Tanü MG520 attack helicopters aser FA50 fighter jets amshia rara, ta osangbenertemisa ashi.
Hopta ka shi sülen Philippine tir Rodrigo Duterte-i tan mezüng atema yimjak nung o jembidang, Marawi nung Islamic State (IS) nung bendanger rarartem aliba ajanga rara nung timtem ajurur, ta ashi.
“Marawi nung Syria, Indonesia, Malaysia, Sri Lanka aser Arab nunger kiralongrartem lir. Onoki tayimtsü amshia rarar kechiyong Middle East nungi kiralongrartem lir. Parnoki taochi kecha melii dang mapa inyaker aser parnok nenok rongsettsü, tekolak atangtsü” ta Butuan city nung sepai tesep ka semdangdang Duterte-i ashi.
Tanü Philippines tiyongtsülen nungi sepai 400 tayimtsü ajanga Marawi-i anir ogo, ta ANC television-i metetdaktsü.
May 23, 2017 nü Philippines nung Muslim nunger atema tongti yimti Marawi nung Islamic State (IS) wako amba telungpurtemi yimti makdoktsü merang.
Iba anema tir Duterte-i Mindanao nung ‘martial law’ alitsü tetuyuba agütsü aser pai ashiba agi IS-i par linük nung tesep ka tentetnüba atema iba mapa inyaker.
Southeast Asia nung parnok yimsüsüba menden ka tentettsü atema IS-i tesep ka nüngdaker, ta mongin nisungtemia ashir.
Marawi yimti nung raraba nung Chechnya, Yemen, Malaysia aser Indonesia linüktem nungi kiralongrar 8 tashi tepsetogo, ta army osang ka ajanga ashi.
Tang tashi nung nisung 329 süogo aser parnok rongnung kiralongrar 225, sepai 59 aser civilians 26 liasü.
Iba rara ajanga pei talidak toktsür aoertem nungia nisung 19 tashi asü. Parnokji tzü mengui timtemba aser satsüpokshi ajanga asü, ta governor Mujiv Hataman-ia metetdaktsü.