Philippine army-i tekolak leptoktsür aliba Germany nunger mang ka angu

Manila, March 05 (Agencies) : Tan hopta Philippines nung Abu Sayyaf telungpurtemi pua aliba Germany nunger ka tekolak tangzüka südaktsüba indang tasümang nguteta lir, ta Philippines military ketdangsertemi metetdaktsü.
Germany nunger Jurgen Kantner ya yaküm November ita pa indang rong (Yatch) nung lia pua bener ao aser pa tasümang tekolak maliji Sulu asetkong nungi nguteta lir. Pa mangji Germany-i bener aotsü, ta ketdangsertemi ashiba Deobarnü osangbenertemi metedaktsü.
Kantner den alisang Sabine Merz-a tena mena aliba rong anasaji khaseter liasü.
Kantner aser Sabine Merz na ya Sabah, Malaysia len rong nung oyaa aliba mapang Abu Sayyaf telungpurtemi aru nokdanger pua bener ao, ta Philippines army temi ashi.
Taoba ita nisung kati nok agi Kantner tekolak tangzükba viedo ka telungpurtemi post süa liasü.
German Foreign Ministry-i, “Nisung taküm ka dak iba ama shiruru dak inyakba ama tepseta intokbaji kanga taoksatsüka lir,” ta ashi.
Abu Sayyaf telok ya Philippines nung aliba telungpur telok rongnung tilaba saka mapa tamajungbo parnoki tesashiba inyaker.
Iba telok ya Islamic State (IS) den lokteper inyaktsü tenangzüktep agiogo.