Philippine: Osangbenertemi Duterte aitsür

Manila, June 02 (Agencies): Alima jenjang nung tentetba osangbentsü teloktemi Philippines Tir tasenba akümtsü jenjang ngua alisang, Rodrigo Duterte tanü, Brehostibar nü aitsüogo.

“Osangbenertem ochimashiba ajanga parnok jenti tepsetogo. Tarutsü nunga ochimashir osangbenertemi tasüba lendong ajurutsü akok,” ta Duterte-i par Philippines nung osangbenertem tepsetba maparen metentsüba olen ka tan Mongolbar nü sangoktsü.

“Philippines nung osangbenertem ozüng alema tepsetba ajanga Philippines linük ya osangbenertem tepsetdak ka akümer,” ta shia, Committee to Protect Journalist tenteti Duterte aitsüba olen ka metetdaktsü.

Taoba küm 20 tsüngda nung osangbener 200 shi tepsetdak, Philippines ya alima ajunga nung osangbenertem asoshi lendong tesashitiba ajuruba linük ka kümogo.

Taoba küm 20 shi Philippines anülulentip tsütsü, Davao yimti mayor inyakba sülen taoba May ita agiba Tir election nung takok ngua, Philippines Tir tasenba akümtsü jenjang ajangzükba sülen arishi küm 71 tain Duterte-i nüburtemi magizüktetba osangtem sangoktsütsü tenzüka lir.

You must be logged in to post a comment Login