Philippine sepaitemi tayimtsü amshia rarar

Manila, July 8 (Agencies): Philippine sepaitemi Marawi yimti nungi Islamic State nungitba kiralongrartem atsüngdoktsü atema ita ka dak tema rarayonga arubaji, azüklen ki talang ajungketa yangluba nungi snipers ajanga lir, ta Honibarnü mitkar otongdar kati ashi.
Iba jagi sorkari yimti nung teraksa nguaka, tayimtsütem amshia amaktsüsa akümer, ta Lieutenant Colonel Jo-ar Herrera-i ashi.
“Onoki tayimtsütem mamshira, sepai taküm aika lalutsü” ta pai Marawi nung osangbener dang ashi.
May 23, 2017 nü kiralongrartemi Marawi yimti atsünga agi aser iba sülen nung sepaitemi parnok den raratsü tenzük.
Yimti tesem aika nung kiralongrartemi Islamic State wako tanak atsüketa lir aser Philippine sepaitemi jet fighters, attack planes aser helicopter gunships amshia rarar.
“Onoki tongtipang tesem kar ajitetogo. Onoki item tesemtem tayimtsütem amshia rarar. Kiralongrartemi ki talangtem agia lir aser onoki parnok idak nungjagi agientsü meranger” ta Herrera-isa shisem.
Rara tetenzükdangbo kiralongrar noklang aika liasü saka tangbo raraba tesem nung kiralongrar 80 shi lir aser iba tesem nung kiojen 800 shi lir, ta paisa metetdaktsü.
Taoba ita tir Rodrigo Duterte-i kiralongrartem ayipdoktsü ta osang metetdaktsüogo, saka iba rara ya mapang talangka agir aser iba jagi nisung 400,000 jungnüa pei talidak toktsür aotsüsa kümogo.
Catholic nung teimba sür aliba Philippines linük nung Marawi ya Muslim yimti ta züngshia liasü saka tangbo iba yimti toktsür nisungtem jena ogo.
Marawi tatalokba ajanga Duterte-i Philippines anüdoklentip ajaklen ‘martial law’ alitsü telemtetba agia liasü.
Marawi yimti rara nung kiralongrar 366, civilian 39 aser sepai 87 tashi taküm samaogo, ta Herrera-isa metetdaktsü.