Philippine tzümetsüng nung nisung 5 asü

Philippines Makati yimti nung August 14, 2016 nü yimti nung alirtem tzü metsünga aliba ajangdanga jajaba noksa nung angur. Iba tzümetsüng lendong nung tajemba agi nisung pongu asü aser 70,000 shi pei aliba tesem yutsür prokshiogo. Iba tzümetsüng yagi Metro Manila dena Philippines anüdoklentip tsütsü tuluba amshi, ta Deobarnü state disaster management agency osang ajanga metetdaktsü.

Manila, August 14 (Agencies) : Anogo aika tzünglu maneni aluba ajanga Philippines nung tzümetsüng adoka nisung pongu asü aser meyirjang aika pei aliba tesem yutsür jenshiogo, ta Deobarnü rescuer temi ashi.
Ano aruyaa aliba anogo ishikabo tzünglu maneni alutsü, ta Manila aser iba tesem anasa alirtem dang Civil defence ketdangsertemi metetdaktsüogo.
Tang nisung 24,000 shi school aser sorkar ki nung jenoka lir.
“Lenten tesemtem nung ano tzümetsüngtsü akok,” ta National Disaster Risk Reduction & Management Council nung otongdar, Romina Marasigan-i AFP dang ashi.
“Tang ‘evacuation centres’ nung jenoka alirtem ajak tsüngsang mopung mejungtet tashi iba tesem nungi marakzüi alitsüla,” ta lai shisem.
Honibarnü Marikina Ayong nungi tzümetsüngteta adokba ajanga Manila nung aliba nisung 9,000 shi iba tesem nungi anienogo.
Council-i, Manila slum nung alir nisung asem tashi tzümetsüng agi long jara laodaktsüdang khenyongi marepa nenset, ta ashi.
Taoba Bodhbarnü Panay asetkonglen nisung ka tzü kanga kara yimya aliba ajangdangtsü merangdang arakseta asüba tasümang Manila canal ka nungi Hokolbarnü agitet.
Ano taoba Hombarnü-a Marinduque asetkong nung angopur ka tzüyim nung sama aser Manila anüdoklen highway ka nung long arangzüka tsükdang nisung ka yiru, ta National Disaster Risk Reduction & Management Council-isa ashi.
Tzü lendong ajanga ki 70,000 dak tema ponger ogo, ta council-i ashi.
Philippines anülulen tsütsüa taoba hopta piyong tzünglu kanga sashia aluogo aser ibaji ajanga tayimtsü jajaba anenba den school-a magitet.