Philippines-i South China tzü case kokogo

The Hague, July 12 (Agencies) : China-i international tzü case ka nung tamakok nguogo. South China len aliba international tzü atema ya mapang talang ka nungi China aser Philippines na kanga atsütepa arua liasü.

The Hague nung aliba international tribunal ajanga iba ken o nung Philippines medentsüogo aser ibaji ajanga iba tzü tsütsü aliba China nunger sepaitem Beijing-i meyipa yoktsü. Iba tzü parnok melemzükba ajanga China nung tapok tulu adoktsü.

Iba obendang angashili China nungeri kangasa mepelaba sayu kechiba süra iba tzü nung economic zones densema lir. China nung official news agency, Xinhua-i iba obendang ya magila obendang lir, ta metetdaktsü.

Communist party meyong osangkaket, People’s Daily yimo züluria, international ozüng nung mela aliba ama tribunal-i ochi obendang magütsü. China sorkar aser nüburtemi iba obendang kanga sashia aitsür aser onoki iba obendang magizüker,” ta zülua lir.

China foreign minister Wang Yi-i, “China nungeri iba obendang magizüktsü aser alima nung ozüng meteter shingaia ibai magizüktsü, ta osangbenertem den jembidang ashi.

“Joko asayamenüba mapang süitemogo aser lenmang shitakba nung inyaksangshitsü mapang tongogo,” ta Wang-i ashi.