Philippines-i UN toktsütsü akok: Duterte

Manila, August 21 (Agencies): Philippines linüki United Nations (UN) tentet toktsür China aser tanga linüktem den aroki lungjemer tentet tasen ka tentettsü amokmerenba olen ka Philippines Tir, Rodrigo Duterte-i tanü, Deobar nü sangoktsüogo.
Philippines sorkari ozüng alema mozü mora shibelenba ken o nung ajemdaker temulung melemi bilemer nisungtem kanga sashia tepsettsü tenzükba maparen ajemtsü asoshi UN-i ajungshiba sülen Duterte-i tanü amokmerenba olenji sangoktsür lir.
Duterte-i Tir menden benokba sülen par sorkari ozüng alema mozü mora shibelenshir ta temulung melemi bilemba nisung den sentakba ken o okadak mangadangi parnok oda tepsetba maparen anentsü asoshi UN kübok Human Rights ketdangsertemi taoba hopta Philippines ajungshiba osang jangjaogo.
Duterte-i taküm May ita 9 nü agiba Tir election nung takok ngua Philippines Tir tasenba akümba sülen pai aniba sorkari ozüng alema mozü mora shibelenshir ta temulung melemi bilemer nisung 900 shi oda tepsetba osang bushiteta lir.
Ajisüaka, par police ketdangsertemi mozü mora shibelenshir ta temulung melemi bilemer nisungtem tepsetba maparen meinyaker ta shia, UN-i par mongintem yoka iba ken o bushisüngdangtsü olen ka Duterte-i tan Hokolbar nüa metetdaktsüogo.
“UN-i ozüng alema mozü mora shibelenshirtem tepsetba indang dang masü saka mozü mora achiba ajanga tai maketba taküm jenti laluba indanga bilemdangtsü nungdaker,” ta pai metetdakja liasü.
Paisa ashiba agi, Philippines den tesendaktep junga ayuba linük, US densema, UN-i par telemtetba aser mapatong takok ngua meinyakteti yur par Philippines linük kübok ken o nung teka amoka par linük aitsütsü meranger.
“Ni UN tentet mezüngmeshitsü mejangrar. Ajisüaka, ozü Philippines linüki UN toktsür China aser Africa linüktem den aroki lungjemer alima tentet tasen ka tentettsü telemtetba agitsü akok,” ta Duterte-i nenshia ashi.
“UN-i ayawara tia melenshitsütsü aser kiralongrartem nokdangtsü mekoktetba den külemi, alima tashi abenba linüktem nem bomb tsükdakja tai maketba nüburtem tepsetdakja Syria aser Iraq na nung lendong atalokba manentsüteti lir,” ta shia, Duterte-i UN aitsü.