Philippines nung kiralongrartem amak

Manila, May 27 (Agencies): Philippine security force temi Honibarnü Marawi nung bomb amshia makogo. Iba yimti nung parnoki Islamist kiralongrartem den anogo pungbuba rarayonga arur.
Tir Rodrigo Duterte-i iba tesem nung ‘martial law’ agütsüogo aser tang tashi nung nisung 48 taküm samaogo.
Islamic State (IS) teloki local caliphate ka tentettsü atema mapa inyakba anema onoki rarar ta Duterte-i ashi.
“Onoki kiralongrar telok samatsütsü atema tayimtsütem amshia amaker. Onoki parnoki alidak metetogo” ta Army otongdar Lieutenant Colonel Jo-ar Herrera-i osangbener dang ashi.
Catholic nunger teimba sür aliba Philippines linük nung Marawi ya Muslim nunger nütsüng teimba aliba yimti ka lir. Yimti nung rara adokba idakji alir nisung 200,000 shi tangalen oa jenoka lir.
Philippines nung IS tanishisang ta temulung melemi bilemer Isnilon Hapilon aputsü merangba sülen Mongulbarnü Marawi nung telungpurtemi yimdong nung ozüng alema mapa inyaktsü tenzük.
Telungpurtem jagi IS wakotem sendak aser tenlaki ka nungi putir ka den tamanger 14 tashi pur ao. Parnokisa kiojentem nung mi senokja rongdoktsü.
Rara nung sepai 13 den police 2 aser kiralongrar 31 tashi süogo, ta ketdangsertemi ashi.