Philippines nung Koppu yipru ajanga nisung 39 taküm samatsü

October 20, 2015 : Northeren Phillipines, Tarlac Province kübok La Paz jila highway nung tzümetsünga alidak nüburtem farm tractor ka nung senzüba noksa nung angur. ‘Typhoon Koppu’ ta ajaba yipru tesashi ajanga northern Phillipines kongshiba sülen anogo ana lir tanü nüburtemi pei ki aser kima yimdong merüktetogo. Typhoon Koppu ta ajaba yipru ajanga süngdong aser light indong laokdaktsüba den külemi tzü metsüngba ajanga yimtaklir aikati pei ki toktsütsüsa akum.

Cabanatuan, October 21 (Agencies) : Philippines tongti asetkong nung yipru lendong nung tasür ajak agi nisung 39 jungogo, ta Bodbarnü ketdangsertemi ashi.

Taoba Deobar nü Philippines nung Tropical Storm Koppu ajanga yimdaklir 100,000 den timba pei talidak toktsür aotsüsa tensa ajurudaktsü aser ano alu tamen aika raksatsü.

Mongulbarnü yipru jagi Luzon asetkong nung kongshi aser Bodbarnü Balintang Channel nung onshiogo, ta Philippines weather bureau ajanga metetdaktsü.

Iba yipru ajanga nisung 39 tashi taküm samatsüogo aser tasürtem teimbaka tzü nung araksetba, anentsü nung, aser süngdong o jara laoa nensetba liasü, ta ketdangsertemisa ashi.

Koppu nung nisung 500,000 den timba timtemer aser parnok rongnung nisung 107,000 tashi evacuation centers nung jenokogo, ta ketdangserisa shisem.

Sorkari tsünüsenbongtsü aser infrastructure raksatsüba asadangba nung sen 5.3 billion pesos ($115 million) shi akoksaba asadangtetogo.

Koppu ya Japan nunger oshi nung ‘marok’ lir aser iba yipru ya taküm Philippines nung 12 buba lir. 2013 nung Philippines nung Typhoon Haiyan ajanga takoksa jenti bener arutsü aser nisung 7,300 den timba asüba mesüra mangu lir.