Philippines nung miim mozü anema rara tenzüker nisung 80 tepsetogo

Manila, August 18 (Agencies): Tir Rodrigo Duterte-i miim mozü (drugs) anema raratsü sangdonger Philippine yimtiba nung hopta tsüngta nisung 80 tepsetogo.
Linük yimtiba, Manila aser iba temeket aliba tesemtem nung miim mozü shibelenba aser yimdong nung azüdokshiba anema raraba mapang hopta tetenzüklen nisung 67 khaset aser 200 dak tali pua liasü.
Iba ama nisung aika tepsetba ajanga linük tatong-tir, Leni Robredo-i anir aitsür aser Robredo ya Duterte anemba telok nungi lir.
Duterte ya linük tir menden nung mener küm ka dak tali jungogo, aser pa yimsüsüba kübok linük nung Philippine nunger nisung meyerijang aika tepsetba anema Robredo-i aija arur.
Miim mozü alirtem mita bushiba mapang police temi Manila nung nisung pezü khaset aser iba tesemi osangbenertem Brehostibar aonung ao.
Saka Caloocan tesem nung lendong adalokba tesem anasai police temi osangbenertem meyok saka nisung tasümang asem bener aoba parnoki angu. Kasa tesem nung anu tasümang ka mini-bus tesülen inoka bener aoba osangbener temi angu.
Manila post office anasa nisung ka khaset, kasa rara dak sendakba nung Malabon tesem nung aliba mozüki ka nung nisung pezü asü aser Quezon City district nung taoba mapang jana indokba tesem nung nisung ka khaset.
Brehostibar aonung Marikina yimti nung motorcycle nung tejak nembanger arua nisung asem khaset.
Iba ama taochi melie nisung tepsetba ya linük aikati aitsür saka Philippines nung aliba nüburtem timbai iba mapa busemer.