Philippines nung yipru tulu adok

Manila, October 18 (Agencies): Philippines nung Deobar nü, Koppu ta ajaba yipru tesashi (typhoon Koppu) adokba ajanga ki aika raksatsüba den nisung 10,000 shi tesem balala nung prokshitsüogo. Iba yipru aitba mapang tzüküm len tzü metre 4 shi ajungketja liasü.
Koppu yipru ajanga Aurora province nung aliba Casiguran jila nungbo anentsüh tulu aludaktsü. Ajisüaka iba tesem nungi yiruyipong osang tang tashi nung kecha mali.
State nung tzü-mopung takzürtemi, Koppu yipru tesashitibaji Honibar aonung süi aser iba mapang ghonda nung mopung kilometre 185 nungi 220 tashi kara ona liasü, ta ashiba Philippine Star ajanga metetdaktsü.
Iba yipru aruba ajanga tan Mongolbar nü tashi tzünglu tesashi alutsü aser mopung tesashi aontsü.
“Kilometre 600 telungtet nung tzünglu kanga sashi alutsü,” ta Philippine Atmospheric, Geophysical & Astronomical Services Administration (PAGASA) ajanga metetdaktsüogo.
Iba yipru ajanga linük yimtiba, Metro Manila nungbo metangshitsü, ajisüaka kilometre 600 telungtet ya kanga tulu anungji anülulentip tsütsü aliba tesemtem nunga tzünglu aser mopung tesashi jagi amshitsü akok, ta PAGASA-isa tekümdangtsü metetdaktsüogo.
Civil defence nung ketdangsertemi, tzüyim nung tzüsem metre 14 tashi ajungkettsütsü akok, ta shia linük tesadang ka nung rong mesenzüdaktsüi anendaktsüogo.
Philippines nung yipur tulutiba adokbaji 2013 küm ‘typhoon Haiyan’ adokba liasü aser iba yipru ajanga nisung 6,300 taküm samatsüba den million aika talidak melii kümdaktsü.