Philippines o China nati tesendaktep tajungba ayutsü nangzükteper

Manila, November 11 (Agencies): Philippines-i China den anendaka aliba bilateral senden tanaben menshia, par linük ana tsüngda tesendaktep tajungba ayutsü asoshi tanü Bodbar nü nangzüktepogo.

Par linük ana tsüngda adokba South China Sea den sentakba mangatettep ken o benteta par linük ana tsüngda tesendaktep tajung ayutsü osang ya Philippines kübok Manila nung Asia-Pacific Economic Cooperation (APEC) leader’s senden amentsü anogo ishika anünga alidang tanü sangoktsür lir.

Kasa senden nung China Tir, Xi Jinping-ia shilem agitsü sentong renemba osang angazükogo.

Philippines aser China nati South China Sea den sentakba mangatettep ken o benteta par linük ana tsüngda tesendaktep tajung ayutsü tenangzükbaji Philippines Foreign Affairs Secretary, Albert del Rosario aser China Foreign Minister, Wang Yi nati tanü agi ta Philippines foreign affairs otongar, Charles Jose-i osang jangjashitsü.

“Ozü foreign affairs secretary, Rosario aser China foreign minister, Wang Yi nati tanü ajurutepa senden amenba sülen ozü linük ana tsüngda tesendaktep tajungba küma yanglushitsü nangzüktepogo,” ta pai ashi.

China-i Philippines den adokba South China Sea den sentakba mangatettep ken o den sentaka onük APEC senden nung mebenoktsü asoshi Wang-i aniba China ketdangsertemi metetdaktsüogo ta pai shisem.

Ano, China lenisang, Xi-i Philippines semdangdang timtem lendong kecha matalokdaktsütsü asoshi par Philippines-i terenemshiba tulu agiba olen ka Jose-i tanü sangoktsü.

China den adokba mangatettep ken o bentettsütsü asoshi Philippines-i International Criminal Court nung taoba mapang, 2013 küm ken o benoka lir.

China-i Philippines linük den külemi, kidangsüa aliba aser APEC nung züngsemba Brunei, Malaysia, Taiwan aser Vietnam linüktem dena South China Sea den sentakba mangatettep ken o tang benoka lir.