Philippines o Malaysia nati Abu Sayyaf anema aroki raratsü nangzükteper

Kuala Lumpur, November 10 (Agencies): Philippines linüki Malaysia aser Indonesia linük den aroki lungjemer Islamist kiralongrar telok, Abu Sayyaf den raratsü tezüngzüktep ka tanü, Brehostibar nü agiogo.
Philippines-i par yimli kübok densemba tzüyim nung Malaysia aser Indonesia na tzüyim mitkar nem Abu Sayyaf kiralongrartem arishitsü melatsü renemba osangji Malaysia Ato Kilonser, Najib Razak-i metetdaktsü.
Anogo 2 agia par linük semdangsang, Philippines Tir, Rodrigo Duterte den ajurutepa senden ka amenba sülen Philippines yimli kübok densemba tzüyim nung Abu Sayyaf kiralongrartem mita arishitsü melatsü tezüngzüktepji agia liasü.
“Abu Sayyaf kiralongrartem arishitsü maparen nung Philippines tzüyim shilem atongba sülena kiralongrartem tetsükdaktsü kecha meli arishitsü temeten nguogo,” ta Najib-i osang jangjashitsü.
Tan agiba tezüngzüktep tali akangshitsü nükjidong nung par linük asemi maneni Vientiane nung tan November ita 22 nü senden menshitsü renemba osang ka pai metetdaktsü.
Abu Sayyaf kiralongrartemi tzüyim arrtsülen ata lir, Malaysia aser Indonesia nübur aser tzüyim sepaitem tashiyim agi pua anir arrtsü adena, Philippines lushi jena aoba osang bushiteta lir.
Chioktsü atema akhangba sen agütsüba sülen Abu Sayyaf teloki tashiyim agi apur nisung karbo chiokba osang angazükogo.
Abu Sayyaf teloki tesüsa Germany senso ka tashiyim agi tan Hombar nü pua anir aoba osang bushitetba osang ka Philippine mitkartemia metetdaktsüogo.
Par teloki Netherlands senso 1, Malaysia nunger 5, Indonesia nunger 2 aser Philippines senso 7 densema, nisung 15 tashi tang tashiyim agi pua ayuba osang bushiteta lir.