Philippines o sorkar anemertemi yimjung mapatong tanaben tenzükshir

Malaysia kübok Kuala Lumpur nung ayongba yimjung senden nung amenba jakdang Government of the Philippines (GPH) Presidential Adviser, Peace Process, Jesus Dureza (Abelen, 2 buba)-i Moro Islamic Liberation Front (MILF) lenisang, Alhaj Murad Ebrahim (Achijilen, 3 buba) den teka amtepa ajurutepdang agiba noksa ka yangi angur. (Kuala Lumpur, August 13)

Kuala Lumpur, August 13 (Agencies): Philippines sorkar aser sorkar anemer Muslim telok na tsüngda yimjung senden tanü, Honibar nü nungi tenzüka tanaben amentsü tenzükogo.
Tan sorkari sorkar anemer den yimjung senden amenba ya Tir, Rodrigo Duterte-i Philippines lenisütsü menden benokba sülen pai aniba sorkari sorkar anemertem den tan mezüngsüa yimjung senden amener lir.
Tir Duterte-i benokba yimjung mapatong takok ngua agitsü nükjidong nung telok ana nungi lenirtemi Malaysia kübok Kuala Lumpur nung par yimjung senden amentsü tenzükba osang jangjaogo.
“Tan amenba yimjung senden nung ozü lenisang, Duterte-i benokba yimjung mapatong benoktsü renema lir saka iba mapatongji tebenja mapatong ka lir,” ta Dutere nem shisatsü agütsüba ketdangser, Jesus Dureza-i sangoktsü.
Ajisüaka, par lenisangi benokba yimjung mapatongji komala ka lir iba osang tejangjabo pai memetetdaktsü.
1970s mapang nungi tenzüka züngsem nisung 12,000 shi züngsemba Moro Islamic Liberation Front (MILF) teloki Muslim nisung kanga lungsoa alidak, Philippines anülulentip tsütsülen densemba tesemtem nung sorkar anema kanga sashia rara aru saka par teloki Philippines sorkar den yimjung tezüngzüktep ka 2014 küm agiba ajanga Philippines anülulentip tsütsülen tesemtem nung aki ama yimji yimjung asangsang nung alitsü ta imlatsü tenzüka lir.
Philippines sorkar den agiba tezüngzüktep nung Mindanao nung autonomous regional sorkar tentettsüba sülen sorkar anemertemi par tongpang nung amshitsü oset sorkar nem bendanga agütsütsü ocet densema lir.
Regional sorkar tentettsü election sentongji Philippines general election agiküm, 2016  May ita agitsü renem saka MILF-i amokbangba tesem nung mitkartemi mitba maparen ka inyaka, police commando 44 tashi 2015 küm tepsetba sülen par telok ana tsüngda agiba yimjung tezüngzüktepji mapa küma mebenshitettsüsa tia ajuru.
Ano külen, Philippines anülulentiptsütsülen ‘Bangsamoro’ regional sorkar tentettsüren nung aroki shilem agitsü asoshi MILF lenisang, Murad Ebrahim-ia Moro National Liberation Front (MNLDD) lenisang, Nur Misuari jaokba osang angazükogo.