Philippines osangbener Maria Ressa bail nung chiok

Manila, Tsüklai/Feb. 14 (Agencies): Philippines nungi sempet angur osangbener Maria Ressa, shiba la indang news platform ajanga Tir Rodrigo Duterte aija zülur, la apuba ajanga linük balala nungi taitsüba osang sangdongba sülen bail nung chiokogo.
Rappler website nung yimo-zülur arishi küm 55 tain Ressa ya Bodhbar aonung linük yimtiba Manila nung aliba National Bureau of Investigation nung pua ayu, shiba “cyber libel” nung aija Bodhbarnü menur pua liasü. Iba ken o nung aitsüra la küm 12 tepuokdak alitsü.
Ressa aser lai ketdangsüba website ajanga Duterte’er administration aser pai miim mozü anema raradang nisung meyirijang aika tepsetba anema osang zülur aser saru memenokba ken o nunga tai tonglokja liasü.
“Ibai maparen ana indang lir: yimten tashi meshidaki amshiba aser ozüng nok-nü ama kümdaktsüba,” ta Ressa-i Brehostibarnü Manila court nungi ayazükdang osangbener tem dang ashi. La iba ken o nung bail nung chioktsü asoshi sen USD 1900 agütsü aser iba ya la asoshi trokben buba lir.
“Asenoki tang kechi angur iba ya asen democracy tepsetba maparen ka lir,” ta 2018 küm Time Magazine Person of the Year nüngja agütsüla Ressa-i ashi.
Ressa apuba ajanga osangbeneri Duterte-i aitsüba amokmerener, ta press freedom advocates aser human rights teloktemi ashir.
“Ressa ya media practitioner aser Philippines tir indang sentongtem anema nokdaker osangbener lennir ka lir, aser lai tang ajurua aliba tensa asoshi onoki kecha inyaktsü makok,” ta tir odongtar Salvador Panelo-i ashi aser paisa obendangba maparen nung ketdangsertemi shilem magi aser akhumtsübua agizüker, tasa shisem.