Philippines shishilemba dak mi adok, 15 rongset

Manila, October 31 (Agencies): Philippines anülulentip tsütsü aliba Zamboanga yimti shishilembadak tesem ka nung ano mesangwa tsüngda mi tesashi adoka yangji oset ayoker nisung 15 den tanur dena rongset, ta police-i ashi.
Iba mi ya gondha asem tashi meremsemteti liasü aser iba mapang nung osettsüset ayoker nisung 13 yirur lir. Iba yimti ya linük yimtiba Manila nungi kilometre 860 ahi pilar lir.
Electric wire sangzüa aliba kar nung mi adoka ibaji lenmang tezülen anüshi tulu mesanga alidak jarulokba ajanga iba lendong adok, ta Senior Superintendent Angelito Casimiro-i metetdaktsü.
Iba lendong nung asür aser yirurtemji süoshi ayoker timba lir aser lendong nung yirurji tanura trok densema lir, police investigator Rafael Salcedo-i ashi.
“Süoshi ayoker kati iba mi adokba angu saka iba mapang nisung ajak mejanga liasü. Anungji pai mi adokba ayimoktsüdang aikati asayar südi ta bilem. Tatsü ka tsüngda nung mi tuluba küma iba lendong tulu atalok,” ta Salcedo-i telephone ajanga ashi.
Tasürtem temangji Muslim nunger leper nung bener oa remogo, ta pai ashi.
Firefighters temi kanga bendanga agüja mi den raraba ajanga anasa aliba business ki tulu merongi kümzük.
Salcedo-i, light kanga oli aruli asüba ajanga iba mi adok südi ta bilemer aser Fire investigators temi electrical department nung inyakertem aia lir maliar bushisüngdangtsü, ta ashi.