Philippines sorkar aser sorkar anemer nati meraratsü nangzükteper

Philippines anülulentip tsütsülen, Mount Diwata nung agiba Communist Party of Philippines tenzüker küm 42 abensaba anogomong nung New People’s Army sorkar anemertemi shilem agiba noksa ka yangi angur. Philippines sorkar aser sorkar anemer na tsüngda meraratsü tezüngzüktep agiba osang ka sorkar tenüng nung jembitsür, Jesus Dureza-i tanü metetdaktsüogo. (Manila, August 20)

Manila, August 20 (Agencies): Tir Rodrigo Duterte aser pai aniba Philippines sorkar aser sorkar anemer nati meraratsü tezüngzüktep agiba osang ka sorkar tenüng nung jembitsür, Jesus Dureza-i tanü, Honibar nü metetdaktsüogo.
Asia ajunga nung sorkar anema mapang talangtiba nokdakbaren bentettsü nükjidong nung par telok ana tsüngda yimjung senden amenba jakdang Philippines sorkar aser sorkar anemertemi tan meraratsü tezüngzüktepji agir lir.
“Philippines sorkar aser sorkar anemer na tsüngda yimjung senden amenba jakdang telok anapronglai meraratsü nangzüktepogo. Iba yimjung mapang ya asüng, Deobar nü nungi tenzüka mapa akümtsü,” ta Dureza-i osang jangashitsü.
Philippines sorkar aser sorkar anemertemi taruba Hombar nü nungi tenzüka, Norway yimtiba, Oslo nung anogo 4 tashi agia, par yimjung senden amentsü sentong renema lir.
Philippines sorkar aser sorkar anemer na tsüngda tongpang kanga sashia raraba ajanga par linük nung terenlok bilemba ama manguba den külemi, tanü tashi nung nisung 150,000 dak tema asüba osang bushiteta lir.
“Ozü Philippines nung yimji yimjung lidaktsütsü aser yimjung senden takok ngua amentsü nükjidong nung tan meraratsü tezüngzüktepji agiogo aser nungdakra, iba yimjung mapangji talangba küma atsülangshitsü,” ta Dureza-i ashi.
Dureza aser pai aniba sorkar ketdangsertemi Oslo yimti bushia aoba jakdang Manila nung tentetba Ninoy Aquino International Airport nung osangbener den ajurutepdang Dureza-i tanü osangji lemsatepa liasü.